ماطاب جرح امصــــــيبتك عاشر اگلـــــوب احبابك
بينه انته تجري اويه الدمه وانـــــحوم فوگ اترابك
اتغيب واتعود الشــــــــمس يالماعــــــــرفنه اغيابك
معروف لو جار الزمــــــــن بجـــــروحنه ندگ بابك
كل يوم انشاهد هالحاله من يگصد محتاج
يرجع والبسمه اعلى اشفافه يرجع لابس تاج
لگينه الحل ولا نقبل نعشگ ثاني اوياك
...................................................................
يحسين سر امحبـــــــــــتك فيــــــها البشر محتاره
وإلينبض ابدمّه العشــــــگ يتعــــــمّد اعلى اخطاره
مايمنع الوادي وجـــــــــــبل طــــــــــول البحر عبّاره
بس انته لوزاد الخــــــــــطر يكـــــــثر عــــدد زوّاره
تتزاحم عالموت احــــبابـــــــك تتعنّه الأخطار
وإليوصل أول يتشرف يرفع كلمة ثــــــار
يموت أوّل ولا يقبل يعشگ ثاني اوياك
موعجبه لو وسط البــــحر موكـــــب عزاك انشوفه
والموج يشعر بالألــــــــــم مــن يلطم اعلى اجروفه
اسمك نعرفه ابكل لغــــــــه محـّــــــــــد يغيّر احروفه
ماعدنه سر ويختــــــــــفي وأفكـــــــــــارنه المعروفه
كل موكب يتصدّر فكره وكل منبر دستور
لتظن بقعه ابهذا العالم ماتعرف عاشور
يجي ويرحل ولا نقبل نعشگ ثاني اوياك
...................................................................
نتفنّن ابنــــــــــــــوع الألم كلــــــــمن اوعنده اسلوبه
كل ضربه تطبع بالصــــــدر لوحـــــــــــــة حذر مكتوبه
واللي يشاهد بالـــــــــــــعزه أم الحـــــــــــــسن مصيوبه
اشعندك اتلومه بعــــــــــــــد لمن يمــــــــــــــــزگ ثوبه
شفنه إلمامر اعلى الدنيه شفنه اشكال اشكال
من قامت واحنه ابهالحـــاله مايتغير حال
فلا ننذل ولا نقبل نعشگ ثاني اوياك
.........................................................................
نتميز ولون الحــــــــــــــــزن مــاتختـــــــــــــــلف ألوانه
واتشوف دمعه ابكل جـــــــفن لازم نعيــــــــــــش احزانه
وإلچان ماعنده وإجــــــــــــــو زوّارك إلصـــــــــــــــيوانه
توصل يبيع اشما مــــــــــــلك بس مايـــــــــــــــسد بيبانه
وإلباع إلعنده وما عنده ويتبسّم للجاي
هذا اينومه وهذا ايوكله وهذا ايشربه الماي
إلك نسأل ولانقبل نعشگ ثاني اوياك
.........................................................................
نحچي اعلى عاشورك سنــه والمــــــــــــده ما محدوده
نختم وأبد مانعـــــــــــــــترف كل واحــــــــــــد ومجهوده
كلمن يروح إلمهنـــــــــــــــته ابيـــــــــــوم الأجر موعوده
زوّار والناعي وخــــــــــــــدم والشـــــــــــــــاعر ورادوده
تتساوى الناس ابعاشورك واحد كلها اتصير
نفس الحرقه ونفس الدمعه ومايحدث تغيير
فلا تنمّل ولا تقبل نعشگ ثاني اوياك
..........................................................................
مرّات ياخدنه الزمـــــــــــــن بمصــــــــــــــايبه وحسباته
لكن إذا هل الشـــــــــــــــــهر لازم تــــــــــــــــــرف راياته
نسكت سنه وگالوا مضـــــت فتره ونســــــــــــــــوا ثاراته
مينام بركان الغــــــــــــــضب لتأمّــــــــــــــــــــــِن ابسكتاته
صح الأقدار اتفرگنه وكلمن راده ايريد
لكن نتجمّع بالشدة ونلزم إيد بإيد
نصير أجمل ولا نقبل نعشگ ثاني اوياك
